Núna er lítið annað gert en að læra. Var að koma af heim rétt í þessu. Er búinn að planta mér í eina stofuna í verkfræðibyggingunni. Tók reyndar létta æfingu í dag annars hefur þetta bara verið lærdómur. Var að lesa eitthvað í listasögu. Þetta er nú meira kjaftæðið. Tíminn byrjaði allt í lagi en núna er þetta orðið frekar súrt. Var að lesa einhverja bók um póst-módernisma. Eftir 10 blaðsíður þar sem ég skildi ekki annaðhvort orð þá ákvað ég að loka bara bókinni. Talaði við nokkra sem eru með mér í tímanum. Þeir eru Kanar en skildu þetta samt ekki þannig að kannski er það ekki svo skrýtið að ég nái þessu ekki. Reyndi að fletta upp á þessu orði á íslenskum vefsíðum og fann einhverjar útskýringar á þessu hugtaki en er þó litlu nær. Fór því bara í eitthvað sem ég skil, þ.e. verkfræði og eitthvað henni tengt. Gott að maður geymdi nammið þangað til síðast.

|

Það er ekkert búið að vera neitt rosalega hlýtt hér í Durham síðustu daga. Rétt í kringum frostmark. Það hefur samt ekki snjóað sem betur fer því að núna er skólinn búinn þannig að maður græðir ekkert á því.
Ég var rétt í þessu að koma frá Greensboro úr kvöldmat. Þetta var bara nokkuð vel heppnað, kannski full langt. Hún var búin skreyta allt húsið með jólaskrauti fyrir okkur og búin að hrista rykið að íslenska fánanum. Þarna var Íslendingur sem heitir Róbert og er hann í UNC Chapel Hill. Hann er víst á síðasta ári og hefur ekkert verið að láta heyra í sér fram til þessa. Hann var furðu mikill Íslendingur í sér miðað við að hann hefur búið úti í Bandaríkjunum síðan hann var sex ára.
Þetta lið sem er að bjóða okkur að gista hjá sér í New York er víst nokkuð vel sett af peningum. Gaf miða á David Bowie tónleika í Madison Square Garden. Ekki að ég sé neinn rosa David Bowie aðdáandi en það verður eflaust gaman að fara í Madison Square Garden. Mér skilst líka að við séum ekkert að fara að sitja með almúganum. Annars segir Þóra að hann sé snillingur og ætlar að láta mig hlusta á hann núna næstu daga. Við keyptum allavegana einhverjar bækur um Ísland á netinu í gær og Independent People eftir Dóra Kornflex og ætlum að gefa þeim til að þakka fyrir okkur.

|

Ég mun reyna í framtíðinni að fækka stafsetningarvillum á þessari síðu sökum fjölda ábendinga. Ég vil samt minna fólk á að ég man kannski ekki lengur allar reglurnar. Maður er orðinn svo mikill Kani.
Síðasti skóladagurinn var í dag, þarf samt að skila lokaverkefni fyrir einn tímann á morgun þannig að það er enn nóg að gera. Fyrirlesturinn í dag gekk bara nokkuð vel. Hann fjallaði meðal annars um hvernig maður á að sniðganga Icelandair.
Annað kvöld er síðan Íslendingakvöldmatur í Greensboro. Þar er íslensk kona, Sólveg Weinel, sem býður mér, Þóru, Agli og Rakel í mat. Kannski ekki hentugasti tíminn að fara til hennar núna en þetta var eini tíminn sem allir komust. Einnig er víst einhver íslenskur strákur í Chapel Hill sem ætlar að mæta. Þetta gæti bara orðið ágætis kvöldstund. Vonandi góður matur allavegana.

|

Ég vil byrja að koma því á framfæri að það eru 9 dagar í próflok og 14 dagar í heimkomu. Bara svo það sé á hreinu. Ég fór í kvöldmatinn hjá liðinu í gær. Þetta var nú meira vælið. Kaninn er svo mikill smjaðrari að það er með ólíkindum. Þarna voru 5 senior-ar að kveðja og allir þurftu að halda ræðu. 4 af þeim voru við það að fara að grenja eða grenjandi í lokin og allir þökkuðu þjálfaranum fyrir allt. Þessir sömu menn þola hann ekki, frekar en restin af liðinu, og baktala hann öllum stundum. Ég breytti til og sagði ekki orð.
Síðan þarf ég að fara að drífa mig að undirbúa fyrirlestur fyrir morgundaginn. Það verður nú eitthvað skrautlegt hvernig ég fylli upp í þær 5 mínútur sem hann á að vera.
Vil enda á því að óska 2 afmælsibörnum til hamingju með daginn. Það er hún Sæunn úr vinnunni sem er 24 í dag og síðan er það gamli vinurinn Jói Biggi sem er 22 ára í dag (maður man þetta ennþá).

|

Það hlaut að koma að því. Eftir nokkra skemmtilega daga koma ansi margir leiðinlegir. Mér finnst ég vera að drukkna í vinnu þessa dagana. Klukkan er núna 1 og ég var að koma af bókasafninu. Próf eftir 8 tíma og svo aftur á bókasafnið. Þetta er stuð. Þarf að mæta í kvöldmat með liðinu á morgun, ég endurtek, ég þarf að mæta. Verð síðan kominn heim eftir 15 daga.

|

Jæja, þá er maður loksins kominn aftur til Durham. Kíkti til Clemson yfir Thanksgiving. Ég vill byrja á því að þakka Silju og Vigni fyrir að hýsa okkur og þakka hinum krökkunum fyrir góða skemmtun (Bjössi, Egill, Eyja og Þóra) Hægt er að skoða myndir úr ferðinni með því að smella á Myndir hér til hliðar. Þetta var mjög góð ferð og er nú þegar farið að plana næstu Thanksgiving. Kalkúnninn heppnaðist mjög vel eins og allt annað og við fengum öll að hitta hinn heimsfræga Jarred.

|