Leiðindavika fer senn að ljúka og því verða eftirfarandi fréttir af mér ekki spennandi. Það er búið að vera alltof mikið að gera og því lítið sofið. 2 próf búin en reyndar nóg heimavinna eftir fyrir morgundaginn. Það er búið að ákveða að gera eitthvað skemmtilegt í lok vikunnar og á morgun fer ég ásamt 7 öðrum út að borða á ítölskum stað hérna. Það styttist nefnilega í afmælið mitt (á mánudaginn fyrir þá sem ekki vita) og því er þetta nokkurs konar afmælismatur. Það er betra að gera þetta á föstudegi þar sem ég er ekki viss um hversu margir væru til í að eyða heilu mánudagskvöldi í mig þar sem það virðast allir hafa nóg að gera. Staðurinn sem við förum á er sá sami og ég hef talað um áður. Ég og Ófeigur fórum þangað fyrir nokkrum vikum og var það afar ljúffengt. Sekkurinn verður í góðum gír þarna.

Í kvöld eru síðan fyrstu forsetakappræðurnar hérna. Það er lítið annað búið að komast að í fréttunum hérna en það fer nú að verða hver síðastur fyrir Kerry að hysja upp um sig buxurnar ef hann ætlar ekki að tapa þessum kosningum. Vonandi gerir hann það. Jæja, nóg af bulli í bili, best að fara aftur að læra.

|

Það er þá ákveðið. Ég fer til New York þar næstu helgi. Ég var að enda við að kaupa miðann rétt í þessu. Ég, Nige, Brai og 3 aðrir strákar úr liðinu ætlum allir. Ég er kominn með gistingu í Columbia Unv. þannig að þetta er allt að smella saman. Það verður ágætt að komast í borg, smá siðmenningu eftir að hafa verið hérna í 2 mánuði.
Svo við snúum okkur að öðru þá var ég alvöru Kani í kvöld. Ég og Dan fórum á einn Biker bar og pöntuðum okkur ógrynni af kjúklingavængjum og borðuðum þá með bestu lyst og horfðum á Monday Night Football. Gerist ekki mikið amerískara. Þetta var á endanum full mikið af því góða og verður erfitt að pína ofan í sig vængjum næstu vikurnar, þó þeir séu algjört lostæti. Já, það er auðvelt að verða sekkur hérna. Þetta var samt frekar varhugaverður staður. Voru að hætta með eitthvað tilboð á vængjunum, voru áður á 25 sent stykkið. Þar sem það féll ekki vel í alla viðskiptavinina þá voru þeir með lögguna á staðnum. Höfðu víst lent í einhverju böggi út af þessu.

|

Ég er kominn tilbaka frá Maryland. Hvernig var Maryland gæti einhver spurt en ég get því miður ekki svarað þeirri spurningu. Jú, hótelið sem við gistum á var fínt, ósköp venjulegt og háskólasvæðið var svipað og flest háskólasvæði. Þessar ferðir eru ósköp leiðinlegar og það breytir nánast engu hvert er farið, þetta rennur allt saman í eitt. Helsta skemmtunin í rútunni var að spila póker og ég veit núna að það er ekki fyrir mig. Það lítur allt út fyrir að planið að fara til Vegas og borga fyrir ferðina með því að græða í spilavítinu gengur jafnvel ekki upp.
Við unnum hins vegar leikinn og höfum því unnið fyrstu 9 leikina. Maryland voru númer eitt í landinu þannig að það var mikil gleði í mannskapnum eftir leikinn. Við áttum þetta reyndar engan veginn skilið en það virðist allt ganga okkur í haginn þessa dagana. HK tapaði hins vegar um helgina og því er þátttöku þeirra í bikarnum lokið í ár. Ég sá úr leiknum á netinu og þetta var nú frekar ómerkilegt mark sem þeir fengu á sig, sjálfsmark. Hundfúlt að tapa svoleiðis.

|