Íslendingur er kominn í úrslitaleikinn í háskólakeppninni hérna úti, NCAA. Gunna og félagar í Notre Dame unnu Unv. of Santa Clare í kvöld 1-0 í hörkuleik. Margir mjög góðir leikmenn í báðum liðum. Þetta eru náttúrulega frábær úrslit. Úrslitaleikurinn er núna á sunnudaginn þannig að það verður spennandi að sjá hvort þær vinni þetta. Ég mætti að sjálfsögðu á leikinn með íslenska fánann að styðja við bakið á henni og hitti þar foreldrana sem voru mættir alla leið frá Íslandi. Ég gæti þurft að horfa á úrslitin í sjónvarpinu þar sem það er próf á sunnudeginum.

Að öðru leyti lítið að segja. Ég náði að klára öll lokaverkefnin í vikunni og núna tekur próflærdómurinn við. Ég fer því núna að loka mig inni á bókasafni í nokkra daga. Verð síðan kominn heim eftir viku þannig að þetta er ekki svo slæmt.

|

Ég fór í golfpróf í morgun. Reglupróf. Þetta var aldeilis strembið. Tók heilar 15 mínútur. Það hjálpaði aðeins til að kennarinn boðaði alla í smá upprifjun á mánudagskvöldið síðasta þar sem farið var yfir eitthvað af prófspurningunum og svörum við þeim. Bara að þetta verði svona í næstu viku í lokaprófunum. Hæpið.
Ég hélt síðan fyrirlestur í dag. Held að það hafi bara gengið ágætlega. Ég skildist alla vega, held ég, og náði að tala í allar 15 mínúturnar sem við höfðum til umráða. Síðasti skóladagur á morgun. Ég held að ég mæti nú ekki í neinn tíma. Töl og líkindafræði er eina fagið á morgun og það er bara of leiðinlegt til að maður nenni að mæta í það. Læri frekar bara, eða ekki.

|

Önnur misheppnuð bíóferðin í röð. Ég fór að sjá Alexander mikla. Þvílík leiðindi. Ég hélt hún ætlaði aldrei að enda. 3 klukkutímar af lífi mínu sem ég fæ aldrei aftur. Heill dagur að hlusta á Gunna Skarp hefði verið sneggri að líða. Ég hefði átt að labba út um leið og ég sá eineygðan Val Kilmer á skjánum. Boðaði ekki gott. Sem betur fer er ódýrt í bíó hérna miðað við heima eða rétt um 400 kall. Það gerir þetta aðeins skárra. Ég vil bara biðja fólk um að sjá þessa mynd ekki.
Svo við snúum okkur að einhverju skemmtilegra þá lét ég loksins verða af því að kaupa mér almennilega hátalara. Ég get því farið að yfirgnæfa reggae tónlistana frá herbergisfélaganum eftir að hafa neyðst til að hlusta á það í 3 ár. (fíla nú orðið eitthvað af því) Það hentaði vel að U2 gaf út nýjan disk á sama tíma þannig að ég hef eitthvað til þess að spila.

|