Erkióvinirnir í Chapel Hill, þ.e. UNC, unnu körfuna hérna úti á síðastliðnu mánudagskvöldi. Það var því dansað á Franklin Street frameftir nóttu. Ég held að það hafi verið um 45 þúsund manns að fagna þessu. Háskólakörfuboltinn er ekkert grín hérna. Þeir áttu þetta skilið enda með ótrúlega gott lið sem nú liðast eflaust í sundur þar sem margir fara væntanlega í NBA á næsta ári. Við í Duke getum verið sáttir með að við unnum þá einu sinni og köstuðum frá okkur sigrinum í seinni leiknum.

Bjössi á svo afmæli á morgun og svo ég gleymi því ekki þá óska ég honum til hamingju með afmælið. Ég tel að það sé algjör óþarfi að nefna það hversu gamall hann er. Kiddi átti afmæli á sunnudaginn og ég óska honum einnig til hamingju með afmælið. Sama gildir með hann. Ég held að það sé algjör óþarfi að vera að nudda honum upp úr því hve árin eru orðin mörg.

Hérna hjá mér má með sanni segja að vorið sé komið. 25 stiga hiti síðustu þrjá daga og ekki kvarta ég á meðan svo er. Núna vil ég helst reyna að finna skóla fyrir masterinn sem er sunnarlega. Meira af þessu veðri.

|

Ég er nánast farinn að labba eins og venjulegt fólk. Ótrúlega ánægjulegt að vera laus við hækjurnar. Maður kann miklu betur að meta að geta gengið og notað báðar lappir eftir að hafa ekki mátt það í langan tíma. Kannski að þetta sé hint að fara nú að spara lappirnar svo þær dugu nú eitthvað áfram.
Eins og áður kom fram þá fór ég upp í fjöll um helgina og gisti þar í sumarhúsi ásamt öllum þessum krökkum. Ferðin heppnaðist vel þrátt fyrir að það hafi snjóað á okkur allan laugardaginn enda góður hópur þarna saman kominn. Ég hlýjaði mér bara í pottinum(ekki hér) og held að ég hafi eytt einhverjum 4 tímum þar á laugardeginum. Svæðið er fallegt og gaf þessi ferð mér alveg nýja sýn á Norður-Karólínu enda Durham kannski ekki hreinasta né fallegasta borgin.
Á föstudeginum, á leiðinni í sumarhúsið, stoppuðu ég og Shadee í Biltmore Estate sem George Vanderbilt lét byggja á sínum tíma og er enn stærsta einbýlishús í Bandaríkjunum þó í dag sé það bara safn. Þeir framleiða einnig vín á staðnum og var okkur boðið í vínsmökkun sem við þáðum með þökkum.
Ég kom síðan heim á sunnudeginum og þá áttaði ég mig á því að það var búið að ræna af mér klukkutíma af helginni þar sem þeir breyttu klukkunni. Við tók mikill lærdómur og býst ég við að það verði meira og minna svoleiðis næstu 3 vikurnar.

|