Það er orðið langt síðan að ég uppfærði þessa síðu þannig að ég tel að það sé kominn tími á það. Margt merkilegt hefur gerst á síðustu dögum og vikum. Fyrst ber að nefna að ég útskrifaðist og telst því nú Duke Alumni. Mamma, pabbi, Ófi, Bjössi og María mættu öll til að fylgjast með þessum merkisatburði í blíðskaparveðri á fótboltavellinum okkar í Duke. Athöfnin var svo sem ósköp hefðbundin og fór vel fram. Forseti Chile, var aðalræðumaður og var hún stutt og kjarnyrt sem er alltaf kostur þegar kemur að ræðum. Að útskrift lokinni kvaddi maður þá sem maður rakst á og því næst var lokið við að pakka og koma öllu í bílinn. Áður en ég kvaddi Durham þá kíkti ég í útskriftarveislu sem prinsessan af Katar hélt. Ég bjóst við svona venjulegu boði en ég hefði átti að vita betur þegar um er að ræða konungborið fólk. Foreldrar hennar voru mættir og með þeim alla vega tveir tugir öryggisvarða. Þegar við ókum í hlað þá lét ég einhvern bara fá lykilinn af bílnum og hann sá um að leggja honum. Ég hefði kannski átt að mæta Geo-num, bara til að sjá svipinn á liðinu :) Forseti Duke var mættur á staðinn og spjallaði ég aðeins við kallinn og heilsaði síðan Emírnum af Katar og konu hans. Veislan var úti í garði en þau höfðu lagt gler yfir sundlaugina hjá sér og þar ofan á persneskt teppi og svo tjald yfir. Þetta var með ólíkindum glæsilegt og matur algjört lostæti. Gestir voru svo leystir út með gjöfum eins og vera ber.
Fjölskyldan fór síðan öll saman á hótel fyrir utan Durham þar sem við gistum síðustu nóttina í Norður-Karólínu. Daginn eftir var svo flogið til New York og svona til að hafa þá sögu stutta þá ætla ég bara að minnast á það sem stóð mest uppúr þeirri ferð. Það voru að sjálfsögðu U2 tónleikarnir sem voru alveg hreint magnaðir. Stemmningin í höllinni var ótrúlega skemmtileg og þeir stóðu sig vel og héltu uppi stuði allan tímann. Ég mæli með þeim.
Ég stefni á því að skrifa svona af og til á síðuna í framtíðinni þó að ég muni ekki hafa neinar sögur af utan að segja lengur. Ég smelli síðan síðustu Duke myndunum á netið von bráðar.

|