Þá er vikan senn á enda og er óhætt að segja að það hafi verið nóg að gera. Ég er því nokkuð feginn að helgin sé loks komin. Mér skilst að það sé verið að fagna októberfest um allan heim og við hér í Norður-Kaliforníu erum engir eftirbátar í þeim efnum. Haldið verður til San Francisco í fyrramálið þar sem stór og mikil októberhátið er haldin. Ég veit að þetta mun ekkert eiga í alvöruveisluna í Munchen en þess virði að athuga stemminguna.
Ég var rétt í þessu að koma úr bíó. Ég fór að horfa á Departed sem var mjög góð og mæli ég því með henni. Með okkur í kvikmyndasalnum var Jerry Rice, sem fyrir þá sem ekki þekkja var frægur amerískur fótboltagaur.
Svo við snúum okkur að öðru þá finnst mér rétt að segja frá því að það getur orðið (og verður) frekar svalt hér á kvöldin. Það er svo sem ekki svo merkilegt nema fyrir þær sakir að þeir byrja ekki að kynda íbúðirnar fyrr en í lok október (að mér skilst). Það er því oft svolítill hrollur í manni á morgnana en upp úr hádegi þá er maður búinn að steingleyma því og kominn á stuttbuxurnar :)

|

Ég held að það séu nógu langt síðan ég skrifaði síðast og því við hæfi að segja örstutt frá atburðum síðustu daga. Það má með sanni segja að skólinn sé kominn á fullt og hver heimadæmin á fætur öðrum hrannast nú upp. Þau fyrstu hafa nú tekið frekar langan tíma en ég er að vona að það sé að hluta til vegna ryðgunar í ýmsum reglum stærðfræðinnar....ég vona það alla vega...annars líst mér ekki á þetta. Við kíktum til San Francisco um helgina þar sem Supperclub var heimsóttur. Það var bara fín stemmning. Svo á sunnudaginn var deildin mín með grillveislu. Þeir telja það mikilvægt að við séum líka félagsleg, ekki bara verkfræðinördar. Ég veit ekki hvort að það tekst hjá þeim en þeir fá plús fyrir að reyna. Þetta heppnaðist mjög vel. Veðrið lék við okkur sem endra nær og við brugðum okkur svo aðeins í fótbolta þar sem ég drottnaði yfir öllum.....langt síðan það gerðist. Ég held að þetta sé málið, þ.e. að velja sér bara léttari og léttari andstæðinga. Það er svo nokkurn vegin komið á hreint að ég verð í Katar um áramótin til 7.janúar, þarf bara að fara að ganga frá hvar og hvenær ég vil fljúga þangað.

|